ՀԳՊԱ-ն խրախուսում է բոլոր ուսանողներին հետևել ակադեմիական ազնվության հիմնական սկզբունքներին բուհ ընդունվելուց ի վեր զերծ մնալու հետագա բարդություններից ու պատժամիջոցներից:
Ակադեմիական ազնվության քաղաքականության հիմքում են հետևյալ հիմնական սկզբունքները՝
- անազնիվ վարքագծի ցանկացած դրսևորման բացառում,
- գրագողության բոլոր դրսևորումների բացառում,
- մտավոր սեփականության ապահովում,
- ազնիվ, արդար ու համագործակցային ակադեմիական միջավայրի ապահովում:
Ակադեմիական անազնվության յուրաքանչյուր դրսևորում բնութագրվում է որպես կրթության բնականոն ընթացքի ձախողում և կարող է հանգեցնել մի շարք լուրջ հետևանքների ինչպես բուհում ուսանելու ժամանակ, այնպես էլ հետագա կարիերայում:
Ակադեմիական ցանկացած գործունեություն ծավալելիս և աշխատանքներ կայացնելիս ազնվություն ցուցաբերելը գործընթացի որակի ևարդյունավետության գրավականն է:
ՀԳՊԱ-ում ակադեմիական անազնվության հիմնական դրսևորումներն են՝
ԱՆԱԶՆԻՎ ՎԱՐՔԱԳԻԾ․ ՀԳՊԱ-ն բացառում է ուսանողների անազնիվ վարքագծի ցանկացած դրսևորում, որը կարող է ներառել տեղեկատվության գաղտնիության կամ էթիկայի նորմերի խախտում, կաշառքի ցանկացած դրսևորում, դասապրոցեսի ընթացքում և քննաշրջանում ոչ պատշաճ վերաբերմունքի ցուցաբերում և այլն:
ԱՐՏԱԳՐՈՒԹՅՈՒՆ․ ՀԳՊԱ-ն անընդունելի է համարում բուհում ակադեմիական աշխատանք կատարելիս կամ քննական շրջանում ուսանողների կողմից այլ նյութերի, աղբյուրների, հեղինակների աշխատանքներից հատվածների արտագրությունը:
ԳՐԱԳՈՂՈՒԹՅՈՒՆ․ Գրագողություն է այլ հեղինակների գաղափարների և աղբյուրներից տվյալների կամ տեղեկատվության օգտագործումը կամ ներկայացումը սեփական աշխատանքում՝ առանց առաջնային աղբյուրի պատշաճ հղման կամ մեջբերման: ՀԳՊԱ-ն անհանդուրժողականություն է ցուցաբերում գրագողության ցանկացած դրսևորման հանդեպ՝ բացառելով բուհում մտավոր սեփականության խախտման դեպքերը:
ՀԵՐՅՈՒՐԱՆՔ ԵՎ ԿԵՂԾԻՔ․ ՀԳՊԱ-ն անընդունելի է համարում ակադեմիական ցանկացած գործունեություն ծավալելիս կեղծ տեղեկատվության տարածումն ու զրպարտությունը։ Ուսանողները չպետք է իրենց աշխատանքներում օգտագործեն չստուգված տեղեկատվություն և կեղծ տվյալներ, չպետք է հղումներ կատարեն անվստահելի կամ գոյություն չունեցող աղբյուրներին, ինչպես նաև անթույլատրելի է աշխատանքում ներկայացնել շինծու, ոչ ճշգրիտ փաստեր և հորինված տվյալներ։
ԱԿԱԴԵՄԻԱԿԱՆ ՏԵՂԵԿԱՆՔՆԵՐԻ ԵՎ ՏՎՅԱԼՆԵՐԻ ԿԵՂԾՈՒՄ․ ՀԳՊԱ-ն բացառում է բուհում ակադեմիական տեղեկանքների, տվյալների կամ գնահատականների ցանկացած կեղծիք կամ միտումնավոր փոփոխում։ Ուսանողների վերաբերյալ բոլոր տվյալները, գնահատականները, տրամադրվող տեղեկանքները, վկայականներն ու դիպլոմները բուհի արդյունավետ և թափանցիկ գործունեության երաշխիքն են։
ԱՐՏՈՆՅԱԼ ՎԵՐԱԲԵՐՄՈՒՆՔ․ ՀԳՊԱ-ն ապահովում է բուհում հավասար, անկողմնակալ, անաչառ և ներառական պայմաններ բոլոր ուսանողների համար՝ երաշխավորելով առողջ ակադեմիական միջավայր ուսանելու, մասնագիտական գիտելիք, կարողություններ ու հմտություն ձեռք բերելու։ Այդ իսկ պատճառովՀԳՊԱ-ն անընդունելի է համարում ակադեմիական գործունեություն իրականացնելիս որևէ առավելության շնորհում ուսանողին այլ ուսանողների նկատմամբ, ինչը կարող է ենթադրել չհիմնավորված բարձր գնահատում կամ քննական նյութերի ու առաջադրանքների տրամադրում։ Ուսանողները նույնպես չպետք է ստեղծեն այնպիսի իրավիճակներ, որոնց ընթացքում կփորձեն առավելություն ստանալ այլ ուսանողների նկատմամբ կամ առանց հիմնավորման սեփական աշխատանքները առավել որակյալ համարելով այլ ուսանողների կատարած աշխատանքներից՝ կփորձեն ստանալ բարձր գնահատական։
ՀԳՊԱ-ն խստորեն հետևում է ակադեմիական ազնվության սկզբունքների պահպանմանը բուհի աշխատակիցների և ուսանողների կողմից։ Ակադեմիական անազնվության ցանկացած դրսևորման դեպքում ՀԳՊԱ-ն սահմանում է հետևյալ պատժամիջոցները՝
- նախազգուշացում՝ խիստ նկատողությամբ,
- դասընթացի/մոդուլի ձախողում,
- աշխատանքի կամ առաջադրանքի վերահանձնում,
- դասընթացի/մոդուլի կրկնություն,
- հեռացում բուհից:
ՀԳՊԱ-ի ակադեմիական ազնվության քաղաքականությանը մանրամասն ծանոթանալ կարելի է այստեղ: