Գրաֆիկա

ՀԳՊԱ-ում Գրաֆիկա կրթական ծրագիրն ուսանողներին լայն հնարավորություններ է առաջարկում ուսումնառության ընթացքում ծանոթանալու գրաֆիկական նյութերին, դրանց բազմազանությանը և յուրահատկություններին, գործնական աշխատանքների միջոցով կիրառելու ոչ միայն դասական, այլ նաև ժամանակակից տեխնիկաներ և տեխնոլոգիաներ: Ձեռք բերված հմտությունները թույլ են տալիս ուսանողներին մասնակցելու տեղական և միջազգային ցուցահանդեսների:

 

 

Աշխատանքը լաբորատորիաներում

 

Մասնագիտական լաբորատորիաներում ուսանողները հնավորություն են ստանում գործնականում կիրառել իրենց գիտելիքները, ստեղծագործել պոլիգրաֆիկական արտադրանքի, հաստոցային և փորագրության ոլորտներում, ստեղծել սեփական նախագծերը:

 

 

Պրոֆեսորադասախոսական և վարչական կազմը

 

Կրթական ծրագրում դասավանդում են ոլորտում երկար տարիների փորձ ունեցող պրոֆեսորներ, մասնագիտական որակներ ունեցող երիտասարդ դասախոսներ, ինչպես նաև աշխատաշուկայում առաջատար կազմակերպությունների ներկայացուցիչներ:

 

 

Շրջանավարտները

 

Գրաֆիկա կրթական ծրագրի շրջանավարտները պահանջված են աշխատաշուկայում և իրենց ուրույն տեղն են գտնում տարբեր հրատարակչական, պոլիգրաֆիկական և այլ արտադրանքի, ինչպես նաև հաստոցային և տպագրական գրաֆիկայի ոլորտներում, դասավանդում են դպրոցներում, քոլեջներում և բուհերում, հաջողությամբ դրսևորում են իրենց որպես ազատ ստեղծագործողներ՝ մասնակցելով տարբեր ցուցահանդեսների, միջոցառումների և աշխատելով պատվիրատուների հետ: Ոմանք իրենց աշխատանքային գործունեությունը իրականացնում են գրաֆիկական դիզայնի, մուլտիպլիկացիայի և ձևավորման ոլոտներում։

 

 

Բակալավրի կրթական ծրագիր (4 տարի, 240 կրեդիտ)

 

Գրաֆիկա բակալավրի կրթական ծրագրի առաքելությունն է, ապահովելով ուսանողների զարգացման և ինքնուրույն ստեղծագործական աշխատանքի համար բարենպաստ պայմաններ, պատրաստել մրցունակ մասնագետներ, որոնք կարող են իրենց մասնագիտական գործունեությունն իրականացնել պոլիգրաֆիկական արտադրանքի տարբեր ճյուղերում, էստամպի և հաստոցային գրաֆիկայի ոլորտներում, ինչպես նաև, ներկայանալով որպես ազատ ստեղծագործող, ստեղծել մնայուն արժեքներ ու նպաստել երկրի մշակույթի և տնտեսության, հասարակության գեղագիտական ճաշակի զարգացմանը։

 

 

Ուսումնառության վերջնարդյունքները

 

«Գրաֆիկա» բակալավրի կրթական ծրագիրը հաջող ավարտելիս շրջանավարտը պետք է.

 

1. Նկարագրի մասնագիտական ոլորտի զարգացումը պատմական համատեքստում, հասկանա և բացատրի գրաֆիկայի տեղն ու դերը հայաստանյան ու համաշխարհային մշակույթում և շուկայում։

 

2. Ստեղծագործի պոլիգրաֆիկական արտադրանքի, հաստոցային և փորագրության ոլորտներում, ինքնուրույն պատրաստելով տպաձևը և տպատիպը՝ ստանա ցանկացած տեսակի և եղանակի օրիգինալ աշխատանք։

 

3. Լուծի առանձին ստեղծագործության կամ նախագծի գրաֆիկական խնդիրները ավանդական և ժամանակակից մասնագիտական տեխնիկաների և տեխնոլոգիաների կիրառմամբ՝ կարողանալով հիմնավորել ընտրությունը յուրաքանչյուր խնդրի համար:

 

4. Ստեղծագործական աշխատանքի ընթացքում անսպասելի տեխնոլոգիական խնդիրների առաջացման դեպքում կարողանա կողմնորոշվել և առաջարկել դրանց լուծման նոր տարբերակներ։

 

5. Գրավոր և բանավոր ներկայացնի սեփական ստեղծագործությունը կամ կատարված աշխատանքը մասնագիտական և ոչ մասնագիտական հանրությանը:

 

6. Օգտագործի ժամանակակից տեղեկատվության և հաղորդակցման տեխնոլոգիաները մասնագիտական խնդիրները լուծելու և ներկայացնելու նպատակով։

 

7. Համագործակցի պատվիրատուի հետ դուրսբերված պահանջներին համապատասխան լուծումներ առաջարկելուց մինչև ավարտուն աշխատանքի ներկայացումը՝ ցուցաբերելով արվեստի պատմության, համապատասխան գրականության և շուկայի իմացություն:

 

8. Կատարի աշխատանքը ինքնուրույն և թիմում՝ ցուցաբերելով աշխատանքը պլանավորելու, սահմանված ժամկետները պահպանելու, հիմնավորված որոշում ներկայացնելու համար անհրաժեշտ տեղեկատվությունը հավաքագրելու, մշակելու և դատողություններ անելու կարողություններ։

 

9. Պլանավորի հետագա մասնագիտական աշխատանքը և կարողանա ինքնակրթվել՝ ոլորտի արդի պահանջներին համապատասխան։

 

10. Պահպանի և տարածի ազգային արժեքները և մշակույթը՝ իր գործունեության մեջ արժևորելով նաև համամարդկային արժեքներն ու ժողովրդավարական սկզբունքները։

 

 

Կրթական միջավայր

 

ՀԳՊԱ-ն ապահովում է ուսանողների համար այնպիսի աշխատանքային միջավայր, որը թույլ է տալիս զարգացնել մասնագիտական և ստեղծագործական կարողությունները: Գրաֆիկա կրթական ծրագրի ուսանողները ակտիվ ներգրաված են բուհի գործունեության մեջ:

 

«Գրաֆիկա» բակալավրի կրթական ծրագրի արդյունավետ իրականացման համար ուսուցումը կազմակերպվում է լսարաններում, լաբորատորիաներում, ինչպես նաև մասնագիտական այլ կառույցներում (օրինակ՝ տպարաններ և ալն):

 

Կրթական ծրագրում մեծ տեղ է հատկացվում ուսանողի ինքնուրույն աշխատանքին՝ որպես վերջինիս ուսուցման լավագույն ձևի՝ նպաստելով անհրաժեշտ գիտելիքի և հմտությունների ձեռքբերմանը: Կրթական ծրագրում գերակշռում է անհատական մոտեցումը յուրաքանչյուր ուսանողի նկատմամբ:

 

Որդեգրելով դասավանդման և ուսուցման ակտիվ և ինտերակտիվ մեթոդներ՝ կրթական ծրագրում մեծ տեղ ու դեր է հատկացվում ներառական մոտեցումների կիրառմանը՝ ապահովելով դասավանդման և ոսումնառության հավասար և անաչառ պայմաններ բոլոր ուսանողների համար:

 

 

Ուսումնական պլանը (2021-2022 ուս. տարի)

 

«Գրաֆիկա» կրթական ծրագրով դասավանդումը և ուսումնառության ավանդական և ժամանակակից մոտեցումների և մեթոդների համակցումը հնարավորություն է տալիս ուսանողներին ձեռք բերել համապարփակ գիտելիք ուսումնասիրվող թեմայի շուրջ, ինչպես նաև զարգացնել համապատասխան հմտություններ ուսումը կրթության հաջորդ աստիճանում շարունակելու, ինչպես նաև աշխատաշուկայում որպես մասնագետ ներկայանալու համար:

 

 

I տարի

 

Ուսուցման առաջին տարին միտված է ուսանողներին ծանոթացնելու գրքի ստեղծման կանոններին, հաստոցային գրաֆիկայի հիմնական օրենքին, ինչպես նաև լինոփորագրության եղանակին: Ուսանողները կհասկանան գույնի, գծի, բծի և տոնի նշանակությունը, կկարողանան ստացած գիտելիքները ճիշտ օգտագործել գիրք և հաստոցային շարք ստեղծելու համար: Կզարգանան նաև հաորդակցության և տեղեկատվական տեխնոլոգիաներ կիրառելու հմտությունները:

 

 

II տարի

 

Ուսուցման երկրորդ տարում ուսանողները կտիրապետեն նկարազարդման տարբեր մոտեցումներին ու ձևերին, կկարողանան աշխատել ճակատանկարի հետ: Նրանք կծանոթանան մետաղի փորագրության տարբեր եղանակներին, ինչպես նաև կխորացնեն գունանկարչության և գծանկարչության հմտությունները:

 

 

III տարի

 

Ուսուցման երրորդ տարին հիմնականում միտված է սեփական և թիմային նախագծերի իրականացնելուն: Այս շրջանակներում ուսանողները կտիրապետեն գրքի առանձին էլեմնետների ստեղծմանը, կկարողանան դիտարկել գիրքը՝ որպես ինքնուրույն արվեստի գործ և կազմել գրքի մակետը: Կկարողանան սեփական աշխատանքները թվայնացնել և աշխատել տառատեսակների հետ: Կծանոթանան լիտոգրաֆիա եղանակին: Այս ընթացքում կխորացնեն արվեստի պատմության գիտելիքները:

 

Տվյալ մակարդակը հնարավորություն է տալիս ուսանողին ինտեգրվել աշխատանքային միջավայր, աշխատել իրական շուկայի պահանջներից բխող նախագծերի շուրջ:

 

 

IV տարի

 

Ուսուցման չորրորդ տարում ուսանողները հմտորեն կաշխատեն գրքի և հաստոցային ոլորտում, կկարողանան ստեղծել ներկայանալի պորֆոլիո հետագա ստեղծագործական գործունեություն ծավալելու նպատալով: Նրանք կկարողանան աշխատել իրական նախագծերի շուրջ իրական պատվիրատուների հետ: Այս մակարդակն ամբղջովին նպաստելու է ավարտական նախագիծը գրագետ և ստեղծագործական ներկայացնելուն:

 

 

Մոդուլները

 

I տարի

 

• Նկարչություն 1
• Գրքային գրաֆիկայի հիմունքներ
• Լինոփորագրություն
• Հայոց պատմություն/Բնապահպանություն
• Նկարչություն 2
• Հաստոցային գրաֆիկայի հիմունքներ
• Գունավոր փորագրություն
• Հաղորդակցություն 1

 

 

II տարի

 

• Նկարչություն 3
• Գրքարվեստ 1
• Մետաղի փորագրություն
• Արվեստի պատմություն 1
• Հաղորդակցություն 2
• Նկարչություն 4
• Գրքարվեստ 2
• Օֆորտ 1
• Արվեստի պատմություն 2
• Կամընտրական դասընթացներ 1

 

 

III տարի

 

• Նկարչություն 5
• Հաստոցային գրաֆիկա 1
• Օֆորտ 2
• Միջոլորտային նախագիծ
• Կամընտրական դասընթացներ 2
• Կոմպոզիցիոն ճեպանկար
• Հաստոցային գրաֆիկա 2
• Թվային գրաֆիկա 1
• Մենատիպ
• Կամընտրական դասընթացներ 3

 

 

IV տարի

 

• Լիտոգրաֆիկա
• Թվային գրաֆիկա 2
• Նախադիպլոմային պրակտիկա
• Քաղ. պաշտպանություն/Փիլիսոփայություն
• Կամընտրական դասընթացներ 4
• Ավարտական ամփոփիչ աշխատանք

 

 

Կամընտրական դասընթացներ

 

Կրթական ծրագրի բոլոր ուսանողները ուսման երկրորդ տարվա երկրորդ կիսամյակից հնարավորություն ունեն ընտրելու մասնագիտական խորացված կամ հարակից ոլորտների դասընթացներ, որոնք կզարգացնեն ընդհանրական և ոլորտին հատուկ կարողություններն ու հմտությունները:

 

 

Ընդունելության պահանջները

 

«Գրաֆիկա» բակալավրի կրթական ծրագրի ընդունելության պահանջներին և ընթացակարգին կարելի է ծանոթանալ այստեղ: