«ՀԱՆՈՒՆ ՀԱՅԻ ՀԱՐԱՏԵՎՄԱՆ» – ՄՐՑԱՆԱԿԱԲԱՇԽՈՒԹՅՈՒՆ
«Մեծն Ներսես» բարեգործական կազմակերպության և Գեղարվեստի պետական ակադեմիայի համագործակցությամբ Կերպարվեստի ֆակուլտետի` գեղանկարչության, գրաֆիկայի և քանդակի բաժնի ուսանողների մրցանակային` «Հանուն հայի հարատևման» խորագրով ցուցահանդեսը բացվել էր հունիսի 14 -ին։ Անցած ուրբաթ տեղի ունեցավ մրցանակաբաշխությունը։ Ցուցահանդեսի մասնակից 41 ուսանողները ներկայացրել էին ընդհանուր 54 աշխատանք, որոնցից 16 – ը` «Գեղանկարչություն», 17- ը` «Գրաֆիկա» և 21 գործ «Քանդակագործություն» անվանակարգերում։ Ցուցահանդեսի մասնակիցներին և հյուրերին ողջունեց Արամ Իսաբեկյանը։ Ծրագրի հովանավոր Միացյալ Նահանգների Արևելյան թեմի առաջնորդ Անուշավան արքեպիսկոպոս Դանիելյանը առողջական պատճառներով չէր կարողացել գալ։ Ներկա էր Առաջնորդարանի դիվանապետ Վարդան Մատթեոսյանը` բանասեր, թարգմանիչ, հայագետ. հեղինակ` հայոց պատմության, գրականության ու լեզվի մասին անգլերեն և իսպաներեն 9 գրքերի («Կոստան Զարեանի շուրջ», «Անվերջ վերադարձ. Հայաստանի ճանապարհները», «Հարաւային կողմն աշխարհի. Հայերը Լատին Ամերիկայի մէջ սկիզբէն մինչեւ 1950», «Շամախեցի պարուհին. Արմէն Օհանեանի կեանքն ու գործը», (համահեղինակությամբ` Արծվի Բախչինյանի)։ Հեղինակ է նաև տասնյակ գրական – բանասիրական ուսումնասիրությունների և թարգմանությունների։ Ներկայացնելով նրա հայագիտական ծավալուն աշխատանքը` ՀԳՊԱ ռեկտոր Վարդան Ազատյանը, դիմելով ուսանողներին, ասաց. «Ուսանողության ուշադրությունը ուզում եմ հրավիրել իր անվան վրա, որովհետև Վարդան Մատթեոսյանը մեր ամենակարևոր հայագետներից է, որ զբաղվում է մեր գիտության հարցերով, շատ կարևոր աշխատություններ ունի։ Սրանք կարևոր կետեր են ինքներս մեզ հասկանալու, մեր ինքնությունը բացահայտելու, ուսումնասիրող, բանիմաց արվեստաբան լինելու համար։ Նրա աշխատանքները այս առումով կարող են լինել ձեզ համար հիմքեր ինքնաճանաչողության»։ Մրցանակաբաշխության ավարտին Վարդան Մատթեոսյանը շնորհակալական խոսք ուղղեց ցուցահանդեսի աշխատանքը համակարգողներին` «Մեծն Ներսես» կազմակերպության գործադիր տնօրեն Տիգրան Գալստյանին, մասնակից ուսանողներին, հանձնաժողովին, և մասնավորապես Գեղարվեստի ակադեմիային, որ «այսպիսի որակի ուսանողություն կպահե իր մեջ»։ Ցուցահանդեսի առաջին` թեկուզ հենց գունային տպավորությամբ երևում է հեղինակներից շատերի տաղանդը, որ է և հույսը վաղվա մեր արվեստի։ «Գաղտնիք մը չէ, – ասաց նա, – որ ամբողջ աշխարհի մեջ արվեստը ճգնաժամի մեջ է` տարբեր իմաստներով, տարբեր պատճառներով` նյութականեն սկսյալ մինչև արվեստի հասկացողություններու կամ տարբեր որակի ընկալումներու, հարցերու կապակցությամբ։ Հայաստանի արվեստի այսօրվա իրավիճակի մասին մանրամասն տեղյակ չեմ, բայց գիտեմ, որ մեր երկրի ներկա բազմապիսի դժվարությունների ընդմեջեն այսպիսի գործ մը կատարելը և հառաջացնելը և այդ աշխատանքը պահպանելը արդեն հերոսություն կը ներկայացնե և շնորհակալություն հայտնել, որ այս գործը կատարելը առիթ կուտա մեզի փոքրիկ չափով մը օգտակար ըլլալ ձեզի։ Կուզեմ հավատալ, որ առաջիկա տարիներուն եթե կարելի ըլլա այս մրցանակաբաշխությունը պահել, միևնույն և ավելի որակով գործեր պիտի ներկայացվին, որոնք մեզի հույս կուտան, որ Հայաստանի արվեստի վաղվան օրը լավ ձեռքերու մեջ է»։ Մրցանակները բաշխվեցին 12 ուսանողների միջև, մնացածները ստացան մասնակցության վկայականներ։ «Գեղանկարչություն» անվանակարգում առաջին մրցանակին արժանացավ Դավիթ Սահակյանը («Գեղանկարչություն» մագիստրոսի կրթական ծրագրի 1-ին կուրս), Երկրորդ մրցանակը տրվեց Արեգ Վահրամյանին, «Գեղանկարչություն» բակալավրի կրթական ծրագրի 2-րդ կուրս), Երրորդ մրցանակը` Արման Վարդանյանին, («Գեղանկարչություն» բակալավրի կրթական ծրագրի 4-րդ կուրս), Խրախուսական մրցանակը` Էլեն Օհանջանյանին, «Գեղանկարչություն» բակալավրի կրթական ծրագրի 3-րդ կուրս)։ «Գրաֆիկա» անվանակարգում` Առաջին մրցանակ ` Ադելինա Միքայելյան («Գրաֆիկա» բակալավրի կրթական ծրագրի 4-րդ կուրս), Երկրորդ մրցանակ` Մարիաննա Քոչարյան («Գրաֆիկա» բակալավրի կրթական ծրագրի 4-րդ կուրս), Երրորդ մրցանակ` Սոնա Ջարահյան («Գրաֆիկա» բակալավրի կրթական ծրագրի 3-րդ կուրս), Խրախուսական մրցանակ` Ելենա Եղիազարյան («Գրաֆիկա» բակալավրի կրթական ծրագրի 2-րդ կուրս)։ «Քանդակագործություն» անվանակարգ Առաջին մրցանակ` Աղվան Սահակյան («Քանդակագործություն» բակալավրի կրթական ծրագրի 4-րդ կուրս), Երկրորդ մրցանակ` Վահե Եղյան («Քանդակագործություն» մագիստրոսի կրթական ծրագրի 1-ին կուրս), Երրորդ մրցանակ` Նարեկ Ստեփանյան, («Քանդակագործություն» բակալավրի կրթական ծրագրի 4-րդ կուրս), Խրախուսական մրցանակ` Անդրանիկ Բաբայան («Քանդակագործություն» բակալավրի կրթական ծրագրի 2-րդ կուրս)։
Մելանյա Բադալյան
Read MoreՀարգելի ուսանողներ
Մրցանակային ցուցահանդես.
«Հանուն հայի հարատևման»
Հունիսի 14֊ին ՀԳՊԱ «Արամ Իսաբեկյանի» անվան դահլիճում բացվեց ուսանողական մրցանակային ներկայանալի ցուցահանդես` «Հանուն հայի հարատևման» թեմատիկ ուղղվածությամբ։ Սա երկրորդ համատեղ ցուցահանդեսն է Գեղարվեստի պետական ակադեմիայի և «Մեծն Ներսես» հասարակական բարեգործական կազմակերպության համագործակցությամբ։
Սոցիալական ծրագրեր իրագործող «Մեծն Ներսես» ԲՀԿ֊ն անցած տարի իր 30 ֊ամյա հոբելյանի առիթով հիմնական առաքելությանը զուգահեռ Լիլիթ Գալստյանի առաջարկով մտահղացավ բարեգործական սլաքն ուղղել նաև մշակույթի ոլորտին, գործունեության ընդհանուր մթնոլորտին գեղարվեստականության շուք հաղորդելու միտումով նաև։ Այս մասին ցուցահանդեսի բացմանը տեղեկացրեց կազմակերպության գործադիր տնօրեն Տիգրան Գալստյանը։
Գեղարվեստի պետական ակադեմիայի նախկին ռեկտոր Արամ Իսաբեկյանի ակտիվ մասնակցությամբ ու առաջարկով սկսված համագործակցությունը արդյունավետ աշխատեց. այս ընթացքում կազմակերպվեց երկու ցուցահանդես` մասնակցությամբ Կերպարվեստի ֆակուլտետի գեղանկարչության, գրաֆիկայի և քանդակի բաժնի ուսանողների։
Հասարակական բարեգործական այս կազմակերպությունը համագործակցում է նաև Գրողների միության հետ` խրախուսելու արձակի, պոեզիայի և մանկագրության ասպարեզի երիտասարդ տաղանդավոր գրողներին։
Արամ Իսաբեկյանի շնորհակալական խոսքն ուղղված էր «Մեծն Ներսես» ԲՀԿ֊ ի տնօրինությանը և կազմակերպության հովանավոր Կիլիկիո կաթողիկոսության միաբանության անդամ, ԱՄՆ Արեւելյան թեմի առաջնորդ Անուշավան Արքեպիսկոպոս Դանիելյանին։
Ուսանողների համար նման մրցանակային ցուցահանդեսները միշտ են ոգևորող, էլ ավելի` գումարային մրցանակները, ինչպես այս ցուցահանդեսինը։
«Հանուն հայի հարատևման» թեման մեզ համար միշտ կարևոր, ներկա շրջանում շատ ավելի ակտուալ է։ Սակայն ներկայացված բոլո՞ր աշխատանքներն են արդյոք համահունչ և կամ առնչվում թեմային։ Թերևս սա նկատի ուներ Արամ Իսաբեկյանը, երբ նկատեց. «Դժվարություններ ենք ունենալու, որովհետև թեմայի հետ կապված խնդիրներ կան։
Ամեն դեպքում ցուցահանդեսում լավ աշխատանքներ շատ կան, և ժյուրին կաշխատի լավագույններն ընտրել։ Հուսով եմ` արդար ընտրություն կլինի։ Հունիսի 21 ֊ին վերջնական արդյունքները կամփոփվեն, կհայտարարվեն մրցանակակիրների անունները»։