Համագործակցության հուշագիր ՀԳՊԱ-ի և «Rockbite Games»-ի միջև
Հայաստանի գեղարվեստի պետական ակադեմիան և «Rockbite Game»-ը («Ռեֆլեքսիվ լաբս» ՍՊԸ) ստորագրեցին երկարաժամկետ նախագծեր իրականացնելու համագործակցության հուշագիր:
Հուշագրի շրջանակում կկազմակերպվեն ու կանցկացվեն մի շարք ուսումնական մոդուլներ, իրադարձություններ և վարպետաց դասեր, որոնք հնարավորություն կտան ՀԳՊԱ-ի ուսանողներին զարգացնելու մասնագիտական հմտությունները, ինչպես նաև ձեռք բերելու աշխատաշուկա մուտք գործելու և գործունեություն ծավալելու նոր կարողունակություններ: Կողմերը հատկապես կարևորեցին նման համագործակցությունը, որը խթանելու է ՀՀ-ում խաղարվեստի զարգացումը:
Կանցկացվի համատեղ «Համագործակցային նախագիծ» մոդուլ, որի շրջանակում ուսանողներն իրական նախագծեր կիրականացնեն՝ համատեղելով ուսումն ու մասնագիտական գործունեությունը: Մոդուլը միտված է զարգացնելու դիզայնի ուսանողների մասնագիտական-գործնական և վերլուծական, ինչպես նաև թիմում և պատվիրատուի հետ աշխատելու հմտությունները՝ պատրաստելով ուսանողներին ապագա գործունեությունը գործնական միջավայրում ծավալելուն:
