Այցելություն արվեստաբան Վիգեն Ղազարյանի արվեստանոց
Վերջերս ՀԳՊԱ արվեստաբանության ամբիոնի դասախոսական անձնակազմը և ուսումնառու արվեստաբանները այցելեցին հայ արվեստաբանության մեջ իր եզակի տեղն ունեցող, մշակույթի վաստակավոր գործիչ, գիտնական, ՀՀԳԱԱ թղթակից անդամ, արվեստագիտության դոկտոր, պրոֆեսոր Վիգեն Ղազարյանի արվեստանոց: Ուսանողները ծանոթացան Ղազարյան-գեղանկարչի տարաբնույթ, բազմաժանր ստեղծագործություններին` բացահայտելով նրան մեկ այլ տեսանկյունից ևս:
Հանդիպման ջերմ մթնոլորտն ապահովում էին ընտանիքի անդամները՝ հետաքրքրական զրույցներով, նվիրական հուշերով կիսվելով հյուրերի հետ: Պետք է նշել, որ նման հանդիպումները դասախոս-ուսանող հարաբերությունները մի նոր հարթության վրա են դուրս բերում և առավելապես արդյունավետ ու հետաքրքրական դարձնում դասախոսությունների հետագա ընթացքը: Արվեստաբան-գեղանկարիչը ուսանողների հետ կիսվեց իր մասնագիտական ձեռքբերումներով, ինչպես նաև որոշ մեկնաբանություններ տվեց իր կտավների վերաբերյալ:
Հանդիպման վերջում Վիգեն Ղազարյանը ուսանողներին հաճելի անակնկալ մատուցեց. նրանց նվիրեց վերջերս հրատարակված իր՝ «Պատուհաններ» խորագրով բանաստեղծությունների ժողովածուն:
ՀԳՊԱ կերպարվեստի տեսության և պատմության ամբիոն
