Գեղանկարչություն

Գեղանկարչությունը՝ որպես կերպարվեստի տեսակ, նշանակալի դեր է խաղում մեր կյանքում` արտացոլելով հասարակության աշխարհայացքի, տարբեր գաղափարների, մտքերի և զգացմունքների բազմազանությունը։ Մյուս կողմից, արվեստի այս ձևը կարող է ազդել հասարակության վրա և այս առումով, դժվար է գերագնահատել գեղանկարչության գեղարվեստական արժեքն ու նշանակությունը մարդկանց ապրելակերպում:

 

Կարևորելով գեղանկարչության տեղն ու դերը առօրյա կյանքում՝ ՀԳՊԱ-ն առաջարկում է «Գեղանկարչություն» կրթական ծրագիր և՛ բակալավրի և՛ մագիստրոսի աստիճաններում՝ նպատակ ունենալով զարգացնել ստեղծագործական երևակայությունն ու մտածողությունը:

 

 

Աշխատանքն արվեստանոցներում

 

Գեղանկարչություն կրթական ծրագրի ուսանողները հնարավորություն ունեն աշխատել ինչպես լսարաններում, այդպես էլ արվեստանոցներում: Հենց այստեղ են ուսանողներն աշխատում իրենց նախագծերի վրա, պրակտիկայում կիրառում ձեռք բերած գիտելիքներն ու հմտությունները, իսկ աշխատանքի ընթացքում վերջիններիս ուղղորդում են ՀԳՊԱ դասախոսները:

 

 

Պրոֆեսորադասախոսական և վարչական կազմը

 

Կրթական ծրագրի հաջող և արդյունավետ իրականացումն ապահովում է ոլորտում առաջատար և մասնագիտական որակներ ունեցող պրոֆեսորադասախոսական և վարչական անձնակազմը: Կրթական ծրագրում դասավանդում են ոլորտում երկար տարիների փորձ ունեցող պրոֆեսորներ, մասնագիտական որակներ ունեցող երիտասարդ դասախոսներ, ինչպես նաև աշխատաշուկայում առաջատար կազմակերպությունների ներկայացուցիչներ: Կրթական ծրագրի շատ մոդուլներ անցկացվում են հրավիրյալ մասնագետների և պոտենցիալ գործատուների անմիջական մասնակացությամբ:

 

 

Շրջանավարտները

 

Ուսումնասիրությունները ցույց են տալիս, որ «Գեղանկարչություն» կրթական ծրագրի բակալավրի և մագիստրատուրայի շրջանավարտների 80-90%-ը հիմնականում իրենց հետագա գործունեությունը ծավալում են մասնագիտական կամ հարակից ոլորտներում:

 

 

Բակալավրի կրթական ծրագիր (4 տարի, 240 կրեդիտ)

 

Գեղանկարչություն բակալավրի կրթական ծրագրի առաքելությունն է ստեղծագործական աշխատանքին նպաստող կրթական միջավայրի ապահովման միջոցով պատրաստել մրցունակ մասնագետներ, որոնք կարող են ազատ ստեղծագործել մոնումենտալ, հաստոցային և դեկորատիվ գեղանկարչության ոլորտներում՝ նպաստելով ազգային մշակույթի զարգացմանը և հասարակության գեղագիտական ճաշակի բարձրացմանը։

 

 

Ուսումնառության վերջնարդյունքները

 

«Գեղանկարչություն» բակալավրի կրթական ծրագիրը հաջող ավարտելիս շրջանավարտը պետք է.

 

1. Ազատ տիրապետի գեղանկարչական և գծանկարչական տեխնիկաների և տեխնոլոգիաների՝ հաստոցային, մոնումենտալ և դեկորատիվ գեղանկարչության բնագավառներում, ցուցադրի ստեղծարար կոմպոզիցիոն մտածողություն:

 

2. Տարբերակի կերպարվեստի գեղարվեստական ոճերի զարգացման առանձնահատկություններն ու պատմական տեսակետները, կարողանա արտահայտել սեփական մտքերը, կարծիքներն ու դատողությունները։

 

3. Դրսևորի հայ և միջազգային արվեստի ակնառու աշխատանքների և դրանց ստեղծման պատմության իմացություն, կատարի մասնագիտորեն հիմնավորված քննադատական վերլուծություն։

 

4. Օգտագործի ավանդական և նորարարական մոտեցումներ՝ դրված մասնագիտական խնդիրների լուծման համար, կարողանա հայերենով կամ որևէ օտար լեզվով գրավոր և բանավոր ներկայացնել կատարած աշխատանքը մասնագիտական և ոչ մասնագիտական հանրությանը։

 

5. Հեռանկարի, անատոմիայի, արվեստի և համաշխարհային մշակույթի տեսության և պատմության բնագավառներում ձեռք բերված տեսական գիտելիքները կիրառի ստեղծագործական աշխատանքում։

 

6. Ճանաչի տեղեկատվություն որոնելու, պահպանելու և մշակելու հիմնական մեթոդներն ու միջոցները (համակարգիչ, գրադարան և այլն), վերլուծի և տեղին օգտագործի ստացած տվյալները մասնագիտական գործունեությունում։

 

7. Նախաձեռնի ու կառավարի կերպարվեստի ոլորտին առնչվող տարաբնույթ նախագծեր, կազմակերպի ինքնուրույն մասնագիտական զարգացման շարունակական գործընթաց։

 

8. Դրսևորի անհատական պատասխանատվություն ստեղծագործական թիմում այլ համահեղինկների և կատարողների հետ ընդհանուր գեղարվեստական գաղափարների շուրջ համագործակցելիս հաստոցային, մոնումենտալ կամ դեկորատիվ գեղանկարչության բնագավառներում լավագույն արդյունքների հասնելու նպատակով։

 

9. Դրսևորի հասարակության մեջ ինտեգրվելու ունակություն, ձևավորի սեփական աշխարհայացքը և գեղագիտական գաղափարների փիլիսոփայությունը՝ ժամանակակից արվեստում տեղի ունեցող փոփոխություններին և միտումներին համապատասխան:

 

10. Ձևավորի և ցուցադրի ակտիվ քաղաքացիական և ստեղծագործական դիրքորոշումն իր գործունեության բոլոր ասպարեզներում, կարողանա բանավոր և գրավոր տեսքով ներկայացնի այն լսարանի առաջ։

 

 

Կրթական միջավայր

 

ՀԳՊԱ-ն ստեղծել է յուրահատուկ միջավայր, որը թույլ է տալիս դասավանդումը համակցել գործընկերային ուսուցման հետ, ուսանողներին ցուցաբերել անհատական մոտեցում՝ նպաստելով ներառական պայմանների և ակադեմիական մշակույթի ձևավորմանը:

 

«Գեղանկարչություն» կրթական ծրագրում լսարանային դասախոսությունները, սեմինար-քննարկումներն ու բանավեճերը համակցվում են արվեստանոցային պրակտիկ պարապմունքների և խմբային աշխատանքների հետ՝ հնարավորություն տալով ուսանողներին սովորել կատարելու միջոցով, խնդիրներին լուծումներ տալ՝ սեփական գաղափարները գեներացնելով և քարտեզագրելով:

 

Կրթական ծրագրի արդյունավետ և հաջող դասավադնման լավագույն դրսևորումներից է ներառականության ապահովումը, որը թույլ է տալիս ուսանողների համար ստեղծել հավասար ու անաչառ պայմաններ, ներգրավել նրանց ուսուցման գործընթացի բոլոր փուլերում՝ ապահովելով առողջ ու գործընկերային կրթական միջավայր:

 

 

Ուսումնական պլանը (2021-2022 ուս. տարի)

 

«Գեղանկարչություն» կրթական ծրագրի դասավանդումն ու ուսումնառությունը իրականացվում է լսարաններում և արվեստանոցներում: Ժամանակակից տեխնոլոգիական մոտեցումներին ու լավագույն ավանդույթներին ուսանողներին ծանոթացնում և ուղղորդում է պրոֆեսիոնալ դասախոսական կազմը, որը դասընթացները համակցում է հրավիրյալ մասնագետների վարպետաց դասերի հետ:

 

 

I տարի

 

Ուսման առաջին տարին ուսանողները ծանոթանում են մասնագիտության բովանդակությանը՝ հնարավորություն ստանալով ձեռք բերել գեղանկարչության վերաբերյալ առաջնային տեսական ու գործնական գիտելիք և հմտություններ:

 

 

II տարի

 

Ուսուցման երկրորդ տարին միտված է խորացնելու և զարգացնելու արդեն իսկ ձեռքբերված գիտելիքներն, ինչպես նաև ձևավորելու և հմտացնելու ուսանողների տեխնիկական մասնագիտական կարողությունները՝ փոխանցելով գեղանկարչական նյութերի և տեխնոլոգիաների վերաբերյալ խորը և համապարփակ գիտելիք և հմտություններ:

 

 

III տարի

 

Ուսուցման երրորդ տարում ուսանողները կշարունակեն յուրացնել ձեռքբերված գիտելիքները և հմտացնել տեխնիկական մասնագիտական կարողությունները՝ ստանալով գեղանկարչության կերպարային և գաղափարային առանձնահատկությունների և տեխնիկաների վերաբերյալ խորը և համապարփակ գիտելիք և հմտություններ:

 

 

IV տարի

 

Ուսուցման չորրորդ տարում ուսանողները կաշխատեն նախապես սահմանված և առաջադրված ավարտական աշխատանքի շուրջ, որը ուղղորդելու է ղեկավար դասախոսը: Ավարտական տարում ուսանողները կիրականացնեն սեփական ամփոփիչ նախագիծը՝ հաշվի առնելով աշխատանքի համար անհրաժեշտ ու կարևոր բոլոր շրջափուլերը:

 

 

Մոդուլները

 

I տարի

 

• Գծանկարչության հիմունքներ
• Գեղանկարչության հիմունքներ
• Հայոց պատմություն/Բնապահպանություն
• Գծանկարչություն 1
• Գեղանկարչություն 1
• Հաղորդակցություն 1

 

 

II տարի

 

• Գծանկարչություն 2
• Գեղանկարչություն 2
• Արվեստի պատմություն 1
• Հաղորդակցություն 2
• Գծանկարչություն 3
• Գեղանկարչություն 3
• Արվեստի պատմություն 2
• Կամընտրական դասընթացներ 1

 

 

III տարի

 

• Գծանկարչություն 4
• Գեղանկարչություն 4
• Միջոլորտային նախագիծ
• Գծանկարչություն 5
• Գեղանկարչություն 5
• Կամընտրական դասընթացներ 2
• Կամընտրական դասընթացներ 3

 

 

IV տարի

 

• Գծանկարչություն 6
• Գեղանկարչություն 6
• Քաղ. պաշտպանություն/Փիլիսոփայություն
• Կամընտրական դասընթացներ 4
• Ավարտական ամփոփիչ աշխատանք

 

 

Կամընտրական դասընթացներ

 

Կրթական ծրագրի բոլոր ուսանողները ուսման երկրորդ տարվա երկրորդ կիսամյակից հնարավորություն ունեն ընտրելու մասնագիտական խորացված կամ հարակից ոլորտների դասընթացներ, որոնք կզարգացնեն ընդհանրական և ոլորտին հատուկ կարողություններն ու հմտությունները:

 

 

Ընդունելության պահանջները

 

«Գեղանկարչություն» բակալավրի կրթական ծրագրի ընդունելության պահանջներին և ընթացակարգին կարելի է ծանոթանալ այստեղ: